Ishujt e Ksamilit janë ishuj relativisht të vegjël shkëmborë që gjenden pranë bregut të detit Jon dhe ofrojnë pamje mahnitëse, me ujë të kaltër gurkali. Ishujt gjenden në lartësi mes 8 dhe 15 metrave mbi nivelin e detit dhe janë vendosur në afërsi me njëri tjetrin, duke krijuar një peizazh tërheqës dhe unik për vizitorët.

Ishujt e Ksamilit ndodhen në afërsi të Parkut Kombëtar të Butrintit dhe kanë një botë të pasur natyrore që përfshin lloje të ndryshme të bimësisë dhe faunës, karakteristike për rajonin mesdhetar.

Flora e ishujve është tipike e vegjetacionit mesdhetar, e njohur si makia, e cila përmban shkurre dhe pemë të tilla si dushku, dafina, dafinë e bardhë dhe mirtë, të cilat përshtaten mirë me klimën dhe përbërjen e terrenit të ishujve. Në zonën bregdetare dhe ujërat e cekëta përreth ishujve, rriten Posidonia oceanica dhe Cymodocea nodosa, bimë detare që janë të rëndësishme për ruajtjen e biodiversitetit në zonat bregdetare dhe luajnë rol në mbrojtjen e ekosistemeve detare ndaj ndotjes dhe ndryshimeve klimaterike.